भाद्र ३, २०८३ / 2026-08-19
काठमाडौं– आगामी शनिबारदेखि सुरु हुने टी–२० विश्वकप अघि पाकिस्तानले भारतविरुद्धको खेल बहिष्कार गर्ने निर्णय लिएपछि अन्तर्राष्ट्रिय क्रिकेट जगतमा ठूलो तरंग पैदा भएको छ ।
पाकिस्तान सरकारले आफ्नो टोली विश्वकप खेल्ने तर भारतसँग प्रतिस्पर्धा नगर्ने स्पष्ट पारेको छ । यस निर्णयले केवल दुई देशबीचको क्रिकेट सम्बन्ध मात्र होइन, सम्पूर्ण प्रतियोगितामै असर पार्ने देखिएको छ ।
पाकिस्तानको निर्णय सार्वजनिक हुनासाथ अन्तर्राष्ट्रिय क्रिकेट परिषद् (आईसीसी) ले पाकिस्तान क्रिकेट बोर्ड (पीसीबी) लाई आफ्नो निर्णयमा पुनः विचार गर्न आग्रह गरेको छ । आईसीसीले चेतावनी दिँदै यस्तो कदमले पाकिस्तानलाई भविष्यमा गम्भीर समस्यामा पार्न सक्ने संकेत पनि दिएको छ ।
भारतविरुद्ध नखेल्ने निर्णयको ठोस कारण पाकिस्तानले सार्वजनिक गरेको छैन। यद्यपि, बंगलादेशलाई टी–२० विश्वकपबाट हटाउने आईसीसीको पछिल्लो निर्णयसँग पाकिस्तान असन्तुष्ट रहेको अनुमान गरिँदै आएको छ । यही असन्तुष्टिको प्रतिक्रिया स्वरूप पाकिस्तानले यस्तो कडा निर्णय लिएको हुन सक्ने विश्लेषण भइरहेको छ ।
आईसीसीको खेलसम्बन्धी नियमअनुसार, कुनै टोलीले खेल बहिष्कार गरेमा त्यस टोलीले २० ओभरमा शून्य रन बनाएको मानिन्छ, जबकि विपक्षी टोलीको एक ओभर गणना हुँदैन ।
यसको प्रत्यक्ष असर पाकिस्तानको नेट रनरेटमा गम्भीर रूपमा पर्न सक्छ, जसका कारण बाँकी सबै खेल जिते पनि समूह चरण पार गर्न मुस्किल हुन सक्छ ।
समूह–ए मा भारत र पाकिस्तानसँगै नामिबिया, नेदरल्यान्ड्स र अमेरिका रहेका छन् । यीमध्ये कुनै एक खेलमा पनि हार बेहोर्नुपरेमा पाकिस्तान समूह चरणबाटै बाहिरिने जोखिममा पर्न सक्छ ।
स्मरणीय छ, अघिल्लो विश्वकपमा अमेरिकाले पाकिस्तानलाई हराउँदै प्रतियोगिताबाट बाहिर पठाएको थियो, जबकि नेदरल्यान्ड्स पनि ठूला उलटफेरका लागि परिचित टोली हो ।
प्रतिबन्धको खतरा अझ गहिरिँदै
आईसीसी र पाकिस्तानबीचको सम्बन्ध विगतदेखि नै सहज छैन । भारतीय क्रिकेट बोर्ड (बीसीसीआई) को आईसीसीमा बलियो प्रभाव रहेको चर्चा हुँदै आएको छ ।
आईसीसी अध्यक्ष जय शाह बीसीसीआईका पूर्वसचिव समेत हुन् । यस्तो अवस्थामा भारतविरुद्ध खेल बहिष्कार गर्ने पाकिस्तानको निर्णयले आईसीसीलाई कडा कदम चाल्न प्रेरित गर्न सक्ने देखिन्छ ।
