रास्वपाबाट लिमा अधिकारीको उम्मेदवारी चर्चा: ‘युवालाई काम र महिला सशक्तीकरण’ मुख्य एजेन्डा

काठमाडौँ- नेकपा एमालेका दिवङ्गत नेता भरतमोहन अधिकारीकी छोरी लिमा अधिकारी यतिबेला राष्ट्रिय स्वतन्त्र पार्टी (रास्वपा) मार्फत राजनीतिको अग्रभागमा देखिएकी छिन्।

नेपाल महिला चेम्बरको वरिष्ठ उपाध्यक्षका रूपमा व्यावसायिक पहिचान बनाएकी अधिकारीले रास्वपाबाट समानुपातिकतर्फ (खस-आर्य समूह) उम्मेदवारीको आकांक्षा राख्दै आफ्ना मुख्य योजनाहरू सार्वजनिक गरेकी छिन्।

अधिकारीले सार्वजनिक गरेको प्रतिबद्धता पत्रमा सामाजिक न्याय, युवा स्वरोजगार र महिला सशक्तीकरणलाई प्रमुख प्राथमिकतामा राखिएको छ।

अधिकारीका मुख्य चुनावी प्रतिबद्धताहरू:

• जनप्रतिनिधित्व र आवाजविहीनको स्वर: जनताका समस्या र आवश्यकतालाई सदनसम्म पुर्‍याउने र समाजका आवाजविहीन वर्गको आवाज बुलन्द गर्ने।
• समावेशी समाज निर्माण: एक न्यायपूर्ण र समावेशी समाज निर्माणका लागि नीतिगत तहमा प्रतिबद्ध रहने।
• लोककल्याणकारी राज्य: राज्यलाई नागरिकको हितमा केन्द्रित गराउन र लोककल्याणकारी अवधारणा कार्यान्वयन गर्न सक्रिय भूमिका खेल्ने।
• युवा स्वरोजगारको नारा: “युवालाई मनपरेको काम, गोजीमा दाम, गाउँ ठाउँमा नाम” भन्ने मूल उद्देश्यका साथ युवाहरूलाई स्वदेशमै अवसर सिर्जना गर्ने।
• महिला सशक्तीकरण: महिलाहरूको सामाजिक र आर्थिक उत्थानका लागि विशेष अभियान सञ्चालन गर्ने।

लामो समय व्यावसायिक क्षेत्रमा अनुभव बटुलेकी अधिकारीको राजनीतिक यात्रालाई अर्थपूर्ण रूपमा हेरिएको छ।

उनका पिता भरतमोहन अधिकारी ‘आफ्नो गाउँ आफैँ बनाऔँ’ र ‘वृद्धभत्ता’ जस्ता लोकप्रिय कार्यक्रमका सूत्रधार मानिन्छन्।