भाद्र १०, २०८३ / 2026-08-26
काठमाडौं – पोखरामा हुने ‘एभरेस्ट महिला भलिबल लिग’मा सहभागी हुन ग्रिसका एक र ब्राजिलका दुई महिला खेलाडी नेपाल आइपुगेका छन् ।
सोमबार साँझ काठमाडौं आइपुगेका खेलाडी भदौ २० गतेदेखि २८ गतेसम्म पोखरामा आयोजना हुने लिगमा कर्णाली यशभिसबाट खेल्नेछन् ।
ग्रिसको राष्ट्रिय महिला भलिबल खेलाडी इभान्जेलिया चान्टाभा, ब्राजिलियन खेलाडीद्वय आना फ्लाभिया र मायरा भिटोरिया सोमबार साँझ काठमाडौं आइपुगेका हुन्।
सन् २००५ देखि व्यवसायिक खेल जीवन सुरु गरेकी चान्टाभाले ग्रिससँगै इटली, टर्की, थाइल्याण्ड, रोमानिया, ब्राजिल, इण्डोनेसिया, जापानलगायत देशका क्लबमा आवद्ध भएर खेलिसकेकी छन् ।
आउटसाइट हिटर चान्टाभाका लागि नेपाली क्लब र मैदान पहिलो हो। सुरुवाती वर्षमा ब्राजिलबाट व्यावसायिक भलिबल खेलेकी आनाले स्पेन, स्लोभाकिया, चेक गणराज्य, हंगेरी र स्विजरल्याण्डबाट खेलिसकेकी छन् ।
