श्रावण ३१, २०८३ / 2026-08-16
काठमाण्डाै – सङ्घीय निजामती विधेयकमा 'कुलिङ पिरियड' व्यवस्थामा भएको छेडखानीबारे छानबिन गर्न गठित सात सदस्यीय संसदीय विशेष छानबिन समिति प्रतिनिधिसभाबाट घोषणा भएको छ । प्रतिनिधिसभाकाे आजकाे बैठकमा सभामुख देवराज घिमिरेले समिति घोषणा गर्नुभएको हो ।
समितिको संयोजक नेपाली कांग्रेसका सांसद जीवन परियार तोकिनुभएको छ । सभामुख घिमिरेका अनुसार समितिमा कांग्रेसबाट जीवन परियार संयोजकसहित र सुशीला थिङ, नेकपा एमालेबाट ईश्वरी घर्ती र नारायण आचार्य, नेकपा (माओवादी केन्द्र) बाट माधव सापकोटा, राष्ट्रिय स्वतन्त्र पार्टी (रास्वपा) बाट गणेश पराजुली र राष्ट्रिय प्रजातन्त्र पार्टी (राप्रपा) बाट रोशन कार्की रहनुभएको छ ।
समितिलाई छानबिन तथा अध्ययनका लागि २१ दिनको समय दिइएको सभामुख घिमिरेले जानकारी गराउनुभयो ।
