भोजपुरका माओवादीको आरोप : पार्टी छाडेका सुदनले भ्रम छरे, आवश्यक परे प्रतिवाद गर्छौँ

काठमाडौं– नेपाल कम्युनिस्ट पार्टी माओवादी केन्द्र, भोजपुर जिल्ला समन्वय समितिले जनार्दन शर्मा प्रभाकरको जनप्रगतिशील अभियानमा जोडिएका नेता सुदन किराँतीले भ्रम छरेको आरोप लगाएको छ ।

माओवादी केन्द्र भोजपुरको जिल्ला कमिटी बैठकले नेता किराँतीबारे यो निष्कर्ष निकालेको हो । बैठकले पार्टी एकता र संगठनबारे महत्त्वपूर्ण निर्णय पनि सार्वजनिक गरेको छ ।

सुदन किराँतीले पार्टी र नेतृत्वविरुद्ध झुट्टा तथा भ्रामक आरोप फैलाइरहेको भन्दै समितिको बैठकले आपत्ति जनाएको हो । किराँतीका यस्ता गतिविधिले राजनीतिक नैतिकता कमजोर बनाउने बताउँदै आवश्यक परे संगठित रूपमा प्रतिवाद गर्न तयार रहेको माओवादीले जनाएको छ ।

पार्टी एकता, संगठन सुदृढीकरण र राजनीतिक स्थिरताका लागि सबै तहका कार्यकर्तालाई सक्रिय भूमिकामा उभिन समितिका संयोजक नगेन्द्र भुजेलले आह्वान गरेका छन्। भुजेल सुदन किराँती पर्यटनमन्त्री हुँदा स्वकीय सचिवालयमा थिए ।

भुजेलका अनुसार बैठकले गाउँपालिका, जनवर्गीय संगठन र मोर्चाबाट आएका रिपोर्टसमेत सुनेको छ । केही ठाउँमा एकता प्रक्रियाबारे भ्रम फैलिएको दाबी गर्दै समितिले सामाजिक सञ्जालमा देखिएका हल्ला निराधार भएको जनाएको छ। सबै कार्यकर्तालाई भ्रममा नपर्न आग्रह गरिएको छ ।

जेन-जी आन्दोलनले उठाएको परिवर्तन, सुशासन, सामाजिक न्याय, समाजवाद र संविधान रक्षा गर्ने एजेन्डालाई मान्यता दिँदै बैठकले कम्युनिस्ट, देशभक्त र समाजवादी शक्तिबीच बनेको नयाँ कम्युनिस्ट पार्टीमा आबद्ध भएर एकीकृत रूपमा अघि बढ्ने पनि निर्णय गरेको भुजेलले बताएका छन् । 

पार्टीबाट बाहिरिएका कारण रिक्त भएका सबै संरचनामा पदपूर्ति गर्ने निर्णय पनि बैठकले गरेको छ ।