भाद्र १, २०८३ / 2026-08-17
सर्लाही- जिल्लाको बरहथवा नगरपालिका–९ रवि चोकबाट कार्तिक १ गते सशस्त्र प्रहरीले शंकास्पद विलविजक भएको ३२ लाख ८९ हजार रुपैयाँ बराबरको नास्पातीसहित दुई वटा ट्रक नियन्त्रणमा लिएको छ ।
म.प्र.०३.००२ ख ३६४१ र प्र. १.०१.००१ख ४४०१ नम्बरको ट्रकमा लोड गरी ल्याउँदै गरेको नास्पातीको विलविजक शंकास्पद देखिएपछि नियन्त्रणमा लिइएको हो ।
साथै उक्त ट्रकका चालक सोही ठाउँ बस्ने देव श्रेष्ठ र भीम बहादुर उप्रेतीलाई सशस्त्र प्रहरी बल नेपाल प्रधान कार्यालयको विशेष अनुगमन टोलिले सुरक्षा वेश सुन्दरपुर चोहर्बा समेतको सहयोगमा नियन्त्रणमा लिएको हो । सो नास्पाती भारततर्फ लैजान लागिएको आशंका गरिएको छ ।
डिएसपी शैलेन्द्र थापाका अनुसार नियन्त्रणमा लिइएका दुवै जनालाई बरामद नास्पाती तथा ट्रकसहित आवश्यक कारबाहीको लागि राजश्व अनुसन्धान कार्यालय पथलैयामा बुझाइएको छ ।
उक्त नास्पातीको मूल्य ३२ लाख ८९ हजार र दुवै ट्रकको मूल्य ५० लाखसहित भन्सार दाखिला मूल्य जम्मा ८२ लाख ८९ हजार रुपैयाँ कायम गरी बुझाइएको छ ।
