रास्वपाका नेताहरूसँग सभामुखको आग्रह : ‘संसदलाई बन्धक नबनाऔँ’

काठमाडौं– सभामुख देवराज घिमिरेले राष्ट्रिय स्वतन्त्र पार्टी (रास्वपा)का कार्यवाहक सभापति डोलप्रसाद (डीपी) अर्याल र प्रमुख सचेतक सन्तोष परियारसँग छलफल गरेका छन् ।

सभामुखको सरकारी निवास बालुवाटारमा सोमबार बिहान भएको भेटमा संसदको अवरोध खुलाउने विषयमा छलफल भएको थियो ।

सभामुखले दुई सातादेखि विपक्षीको अवरोधले संसद बन्धक भएको उल्लेख गर्दै बजेटबारे ब्यापक छलफल गर्नुपर्ने समयमा संसद अवरुद्ध हुँदा जनतामा गलत सन्देश जाने भन्दै यसबारेमा विचार गर्न आग्रह गरेका थिए । 

उनले भने, ‘विपक्षीले उठाएका मुद्दा गम्भीर छन्, त्यही भएर दुई सातासम्म संसदलाई सहमतिका लागि रोकेको हुँ । तर, अब रोक्ने अवस्था छैन । संसदको नेतृत्वका हिसाबले मैले संवैधानिक सीमालाई पनि ख्याल गर्नुपर्दछ । राष्ट्रिय सभाले ५ गतेभित्र प्रतिनिधिसभाबाट विनियोजन विधेयक पठाउन भनेको छ । यस्तो अवस्थामा जुनसुकै हालतमा बजेट पारित गर्नै पर्दछ । तपाईंहरूले आफ्नो आन्दोलनको स्वरुप बदलेर पनि संवैधानिक सीमा र बाध्यता बुझ्नुपर्छ ।’

उनले सरकारसँग संवादका लागि आवश्यक सहजीकरणका लागि आफू तयार रहेको भन्दै गम्भीर भइदिन आग्रह गरे ।

रास्वपा नेताहरूले भने आफ्ना माग र मुद्दामा सरकार गम्भीर नभएकाले संसद अवरोध बाध्यात्मक भएको बताएका थिए । अहिलेकै अवस्थामा हामी मुद्दाबाट पछाडि फर्कन सक्ने अवस्था नरहेको उनीहरूको जवाफ थियो ।