चक्रवात अर्णबको कहर स् भारतको आन्ध्र प्रदेशमा तीन जनाको मृत्यु, ओडिशामा सतर्कता

काठमाडौं । भारतको पूर्वी तटीय क्षेत्रमा चक्रवात अर्णबले ठूलो क्षति पुर्‍याएको छ। आँधीका कारण आन्ध्र प्रदेशमा तीन जनाको मृत्यु भएको छ भने ३१ घरमा क्षति पुगेको छ। चक्रवातको प्रभावबाट ओडिशा र झारखण्डका विभिन्न जिल्लामा समेत भारी वर्षा र तीव्र हावाको जोखिम बढेको छ।
भारतीय सञ्चारमाध्यमका अनुसार बुधबार (२८ अक्टोबर) बिहान चक्रवात अर्णब आन्ध्र प्रदेशको काकीनाडा र पुडुचेरीको यानम क्षेत्रबीचको तटीय भूभागमा प्रवेश गरेको थियो। चक्रवातका कारण तटीय क्षेत्रमा जनजीवन प्रभावित हुनुका साथै सयौँ रूख र विद्युत्‌का पोल उखेलिएका छन्।
राष्ट्रिय विपद् प्रतिकार्य बल (एनडीआरएफ) का महानिरीक्षक नरेन्द्र सिंह बुन्देलाले आन्ध्र प्रदेश आँधीबाट सबैभन्दा बढी प्रभावित भएको जानकारी दिएका छन्। उनका अनुसार आन्ध्र प्रदेशको उत्तरी भाग र ओडिशाको दक्षिणी क्षेत्र बढी प्रभावित भएका छन्। दुवै राज्यमा उद्धार तथा विपद् व्यवस्थापन टोलीलाई तयारी अवस्थामा राखिएको छ।
चक्रवात जमिनमा प्रवेश गर्ने क्रममा हावाको अधिकतम गति प्रतिघण्टा १२५ देखि १३५ किलोमिटरसम्म पुगेको भारतीय मौसम विज्ञान विभाग (आईएमडी) ले जनाएको छ। बुधबार बिहान ८ः३० बजेसम्ममा यसको तीव्रता घटेर गम्भीर चक्रवाती आँधीमा सीमित भएको थियो। आगामी समयमा यो थप कमजोर हुँदै जाने अनुमान गरिएको छ।
ओडिशामा ३० हजारभन्दा बढी मानिस सुरक्षित स्थानमा
चक्रवातको सम्भावित प्रभावलाई ध्यानमा राख्दै ओडिशा सरकारले ३० हजारभन्दा बढी मानिसलाई सुरक्षित स्थानमा सारेको छ। राज्यको दक्षिणी क्षेत्रमा उच्च सतर्कता अपनाइएको छ भने जोखिमयुक्त बस्तीका बासिन्दालाई राहत शिविरमा स्थानान्तरण गरिएको छ।
राज्य सरकारले गंजम, गजपति, रायगडा, कोरापुट, मलकानगिरी र नबरंगपुर जिल्लामा विशेष निगरानी बढाएको छ। तल्लो भूभाग र पहिरोको जोखिम भएका क्षेत्रका बासिन्दालाई सुरक्षित स्थानमा सार्ने काम गरिएको अधिकारीहरूले बताएका छन्।
भारतीय मौसम विज्ञान विभागले मलकानगिरी, कोरापुट, नबरंगपुर, रायगडा, गजपति र कालाहांडी जिल्लामा भारीदेखि अति भारी वर्षाको चेतावनी दिँदै रेड अलर्ट जारी गरेको छ। ती क्षेत्रमा प्रतिघण्टा ६० देखि ८० किलोमिटरसम्मको हावा चल्न सक्ने अनुमान गरिएको छ। लगातारको वर्षाले पहाडी क्षेत्रमा पहिरोको जोखिमसमेत बढाएको छ।
झारखण्डमा पनि भारी वर्षाको चेतावनी
चक्रवातको प्रभाव झारखण्डमा समेत देखिएको छ। राजधानी राँचीसहित विभिन्न जिल्लामा बुधबार बिहानदेखि वर्षा भइरहेको छ। मौसम विभागले राँची, खुन्टी, सिमडेगा, गुम्ला, लोहरदगा, बोकारो, सरायकेला–खरसावाँ तथा पूर्वी र पश्चिम सिंहभूम जिल्लामा भारी वर्षाको चेतावनी दिएको छ।
वर्षा र चिसो हावाका कारण राज्यको तापक्रम तीनदेखि चार डिग्री सेल्सियससम्म घट्न सक्ने अनुमान गरिएको छ। सावधानीका रूपमा राँची र लोहरदगा जिल्लामा अक्टोबर २८ र २९ का लागि कक्षा १२ सम्मका विद्यालयको पठनपाठन स्थगित गरिएको छ।
हवाई सेवा प्रभावित
चक्रवातका कारण विशाखापट्टनम, विजयवाडा र राजमुन्द्री विमानस्थलबाट हुने उडानसमेत प्रभावित भएका छन्। विभिन्न एयरलाइन्सले उडान रद्द गरेका छन् भने केही उडानमा ढिलाइ भएको छ।
भारतको नागरिक उड्डयन मन्त्रालयले यात्रुलाई विमानस्थल जानुअघि आफ्नो उडानको अवस्था जाँच गर्न आग्रह गरेको छ। साथै, उडान रद्द वा ढिलाइ हुँदा पुनः बुकिङ तथा टिकट रकम फिर्तासम्बन्धी जानकारी उपलब्ध गराउन एयरलाइन्सलाई निर्देशन दिइएको छ।
चक्रवात कमजोर हुँदै गए पनि आन्ध्र प्रदेश, ओडिशा र झारखण्डका प्रभावित क्षेत्रमा वर्षा तथा तीव्र हावाको जोखिम कायमै रहेकाले उद्धार टोली र सम्बन्धित निकायलाई सतर्क अवस्थामा राखिएको छ।