कार्तिक २, २०८३ / 2026-10-18
काठमाडौं – दसैँ–तिहारको बिदालाई लक्षित गर्दै ओटीटी प्लेटफर्म ‘सिनेमा घर’ले ‘दसैँ–तिहार मुभी मेला’ आयोजना गरेको छ । मेलाअन्तर्गत दर्शकले घरमै बसेर विभिन्न आठ नेपाली फिल्म डिजिटल माध्यमबाट हेर्न सक्नेछन् ।
सिनेमा घरका अनुसार मेलामा ‘ह्रस्व दीर्घ’, ‘के घर के डेरा : घर नम्बर २’, ‘लाज शरणम्’, ‘मायावी’, ‘कार्साङ’, ‘हरिबहादुरको जुत्ता’, ‘कठपुतली’ र ‘प्रवासी जीवन’ उपलब्ध छन् ।
दसैँ–तिहारको लामो बिदामा दर्शकलाई नेपाली फिल्म हेर्ने अवसर उपलब्ध गराउने उद्देश्यले मुभी मेला आयोजना गरिएको हो । यसमार्फत दर्शकले हलसम्म पुग्न वा टेलिभिजनमा फिल्म प्रसारण हुने समय कुर्न नपरी आफूलाई अनुकूल समयमा फिल्म हेर्न सक्नेछन् ।
दर्शकले मोबाइल, ट्याब्लेट, कम्प्युटर तथा स्मार्ट टिभीबाट सिनेमा घरमा उपलब्ध फिल्म हेर्न सक्नेछन् । यसको एप गुगल प्ले स्टोर र एप्पल एप स्टोरबाट डाउनलोड गर्न सकिन्छ । एन्ड्रोइड टिभी, अमेजन फायर टिभी, सामसुङ स्मार्ट टिभी तथा एलजी वेबओएसमा समेत एप प्रयोग गर्न सकिनेछ । त्यस्तै, क्रोमकास्टको सहायताले मोबाइलमा रहेको सामग्री टेलिभिजनमा हेर्न सकिने सुविधा पनि छ ।
नेपाली फिल्मलाई डिजिटल माध्यमबाट देश तथा विदेशका दर्शकमाझ पुर्याउने उद्देश्यले सञ्चालनमा रहेको सिनेमा घरले हलमा प्रदर्शन भइसकेका फिल्मलाई अनलाइनमार्फत उपलब्ध गराउँदै आएको छ । यसले विदेशमा रहेका नेपाली दर्शकलाई समेत नेपाली फिल्म हेर्ने अवसर प्रदान गर्ने अपेक्षा गरिएको छ ।
दसैँ–तिहारको बिदामा घरमै बसेर मनोरञ्जन लिन चाहने दर्शकका लागि मुभी मेला नेपाली फिल्म हेर्ने विकल्प बनेको छ ।
