आश्विन १७, २०८३ / 2026-10-03
काठमाडौं- काठमाडौं महानगरपालिकाका निवर्तमान मेयर बालेन्द्र साहले मात्रै चढ्ने गरेको लिफ्ट आइतबारदेखि सबै कर्मचारुी र सेवाग्राहीका लागि खुलाइएको छ।
महानगरकी कार्यवाहक मेयर सुनिता डंगोलको निर्देशनमा महानगरमा रहेको एउटा लिफ्ट सेवाग्राहीका लागि खुला गरिएको महानगरका प्रवक्ता नवीन मानन्धरले बताएका छन् ।
कमलादीस्थित भाडाको भवनमा जडान गरिएको लिफ्ट महानगरमा मेयर हुन्जेल पासवर्ड लगाएर बालेन्द्र र उनको सचिवालयका सदस्यले मात्रै चढ्ने गरेका थिए । यो लिफ्ट २०८१ साउनमा जोडिएको थियो ।
उक्त महानगर कार्यालयको पार्किङ एरियामा जडान गरिएको थियो । उक्त लिफ्ट प्रयोग गर्न अरूलाई निषेध भएको अवस्थमा माघ पहिलो साता बालेन्द्र महानगरबाट बिदा भएपछि सबैका लागि खुलाइएको हो ।
महानगरपालिकाको कमलादीस्थित कार्यालयको पार्किङ एरियामा रहेका दुईवटा लिफ्टमध्ये यसअघि एउटा मात्रै सेवाग्राहीका लागि सञ्चालित थियो । अर्को लिफ्टमा भने नगर प्रहरी नै तैनाथ गराएर राखिने गरिएको थियो ।
कमलादीस्थित महानगरका दुई भवनमध्ये एकातर्फ मेयर, उपमेयर, प्रशासकीय अधिकृत र वातावरण विभागको कार्यालय छ । अर्कोमा अन्य शाखा, महाशाखाहरू राखिएका छन् ।
पासवर्ड नै राखेर बालेनले मात्रै एउटा लिफ्ट चलाउने गरेको पाइएपछि एक समय त्यसको आलोचना पनि भएको थियो । बालेनले आफूसम्म कर्मचारी र सेवाग्राही आमनेसामने नहुन् भन्ने धेयले उक्त लिफ्टमा पासवर्ड राखेर सिधै पाँचौँ तलामा पुग्ने गरी व्यवस्था गरेका थिए ।
त्यसरी अलग्गै लिफ्टबाट जाँदा उनलाई महानगरका कर्मचारी र सेवाग्राही कसैले पनि देख्न पाउँदैन थिए । तर अब उनी बिदा भएसँगै उक्त लिफ्ट सबैका लागि खुलाइएको हो ।
