भाद्र १, २०८३ / 2026-08-17
काठमाडौँ । शिक्षकको कार्यसम्पादन मूल्याङ्कन औसतमा ९० प्रतिशतबाट ८० प्रतिशतमा झार्ने प्रस्ताव प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिबाट पारित भएको छ । समितिको बिहीबार सिंहदरबारस्थित सचिवालयमा बसेको बैठकमा शिक्षा ता विज्ञान प्रविधि मन्त्रालयले गरेको प्रस्ताव समितिले पारित गरेको हो ।
मन्त्रालयका सचिव चूडामणि पौडेलले ‘विद्यालय शिक्षा विधेयक सम्बन्धी उपसमितिको प्रतिवेदनका सम्बन्धमा मन्त्रालयबाट प्राप्त पछिल्लो सुझाव’ शीर्षकमा पेस गरेको प्रस्ताव समितिले पारित गरेको हो ।
विद्यालय शिक्षा विधेयक सम्बन्धी उपसमितिको प्रतिवेदनमा भएको व्यवस्थालाई परिमार्जन गर्दै ८० प्रतिशत बनाउन सचिव पौडेलले राखेको प्रस्ताव समितिले पारित गरेको हो ।
‘शिक्षकको कार्यसम्पादन मूल्याङ्कनको गणना गर्दा पछिल्लो पाँच वर्षको कार्यसम्पादन मूल्याङ्कनमा औसतमा नब्बे प्रतिशत भनी विद्यालय शिक्षा विधेयक सम्बन्धी उपसमितिको प्रतिवेदनमा भएको व्यवस्थालाई परिमार्जन गरी असी प्रतिशत गर्ने,’ मन्त्रालयले गरेको प्रस्तावमा उल्लेख छ ।
