भाद्र ११, २०८३ / 2026-08-27
काठमाडौं, १४ भदौ । इराकको बग्दादमा भड्किएको हिंसात्मक प्रदर्शनका क्रममा कम्तीमा ३० जनाको मृत्यु भएको छ । समाचारसंस्था अलजजिराका अनुसार हिंसात्मक प्रदर्शनका क्रममा ७०० जनाभन्दा बढी घाइते भएका छन् । जसमा सैन्य बलका ११० जना सामेल छन् ।
इराकका शक्तिशाली शिया मुस्लिम धर्मगुरु मुक्तदा अल-सद्रले आफ्नो राजनीतिक जीवन त्यागेको घोषणा गरेसँगै बग्दादमा प्रदर्शन सुरु भएको थियो । प्रदर्शनकारीहरुले सरकारी कार्यालय र राष्ट्रपति भवन कब्जा गर्न खोजेपछि प्रदर्शन हिंसात्मक बनेको थियो, जसमा अहिलेसम्म कम्तीमा ३० जनाको मृत्यु भएको हो ।
हिंसात्मक प्रदर्शनका कारण बग्दादमा उडानहरु प्रभावित भएका छन् । दुबईको इमिरेट्स एअरलाइन्सले बग्दादका लागि तय भएका आफ्ना सबै उडानहरु रद्द गरेको छ । उसले त्यहाँको अवस्था हेरेर आगामी दिनमा उडान हुने नहुने तय गर्ने बताएको छ ।
प्रदर्शनका क्रममा धर्मगुरुका समर्थक र इरानको समर्थनमा रहेका समूहबीच झडपसमेत भएको समाचारमा जनाइएको छ । प्रदर्शन हिंसात्मक बनेपछि रोक्नका लागि सैन्य प्रशासनले कर्फ्यू लगाएको छ ।
