भाद्र ११, २०८३ / 2026-08-27
काठमाडौं, ३० असार । प्रतिनिधि सभाको उपसभामुखमाको निर्वाचन शुक्रबार दिउँसो ३ बजे हुँदैछ । प्रतिनिधि सभाको उपसभामुखमा नेपाली कांग्रेसका सांसद पुष्पा भुसाल र नेकपा एमालेका सांसद विद्या भट्टराईबीच प्रतिस्पर्धा हुने भएको छ ।
बिहान ११ बजेदेखि दिउँसो १ बजेसम्म भुसाल र भट्टराईको मात्रै उम्मेदवारी परेको हो । भुसाल पाँच दलीय सत्ता गठबन्धनका तर्फबाट उपसभामुखमा साझा उम्मेदवार हुन् । भट्टराई भने प्रमुख विपक्षी नेकपा एमालेकी उम्मेदवार हुन् ।
प्रतिनिधि सभामा एमालेको ९८, कांग्रेस ६३, माओवादी केन्द्रको ४९, एकीकृत समाजवादी २३, जनता समाजवादी २१, लोसपा १३ र अन्य साना दल र स्वतन्त्र समेत गरी ४ जना सांसद रहेको छ ।
पुष्पा भुसाल अर्घाखाँची पोखराथोकका २०२८ सालदेखि राजनीतिमा आवद्ध छन् । २०१७ साल फागुन १ गते जन्मिएकी भुसालले कानुनमा स्नातक र राजनीतिशास्त्रमा स्नातकोत्तर गरेकी छन् । त्रिभुवन विश्वविद्यालयमा १७ वर्ष प्रध्यापन गरेकी भुसाल वरिष्ठ अधिवक्ता समेत हुन् । उनी केही समय कानुन व्यावसायमा पनि सक्रिय भएर लागिन् । २०६४ सालको संविधानसभा सदस्य निर्वाचनमा अर्घाखाँचीबाट निर्वाचित भएर उनले संविधान निर्माणमा भूमिका खेलिन ।
कांग्रेसको महिला विभाग, कानुन विभागमा लामो समय क्रियाशील उनले नेपाल महिला संघको महासचिव भएर पनि काम गरेकी छन् । महिला अधिकार र समानताको पक्षमा वकालत गर्दै आएकी भुसालले विश्वविद्यालयमा प्रध्यापन, कानुन व्यावसाय र राजनीतिलाई एकसाथ बढाएकी थिइन् ।
उनले संविधान मस्यौदा समितिमा रहेर काम गरिन् । २०६३ सालको अन्तरिम संविधान मस्यौदा समितिमा समेत कांग्रेसका तर्फबाट प्रतिनिधित्व गर्दै भूमिका निर्वाह गरेकी नेता हुन भुसाल । २०७४ सालको चुनावबाट समानुपातिक सांसदमा निर्वाचित भएर आएपछि भुसाल उपसभामुखको निर्वाचनमा उम्मेदवार थिइन् । २ चैत २०७४ मा भएको उपसभामुखको चुनावमा भुसाल सांसद शिवमाया तुम्बाहाम्फेसँग पराजित हुन पुगेकी थिइन् । तत्कालीन वाम गठबन्धनकी उम्मेदवार तुम्बाहाम्फे २०१ मत प्राप्त गर्दै विजयी हुँदा भुसालले ५८ मत प्राप्त गरेकी थिइन् ।
तुम्बाहाम्फेले राजीनामा दिएपछि रिक्त भएको सोही पदमा भुसालले अहिले फेरि उम्मेदवारी दिएकी हुन् । यो पटक उनलाई कांग्रेससहित पाँचदलीय गठबन्धनमा आवद्ध नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा) र राष्ट्रिय जनमोर्चाको समर्थन छ ।
पारिवारिक पृष्ठमूमि राजनीति नै भएको भुसाल २०१५ सालको बीपी कोइरालाको मन्त्रिपरिषदमा स्वास्थ्यमन्त्री रहेका काशीनाथ गौतमका छोरी हुन् । २०१७ सालमा पञ्चायत सुरु भएपछि काशीनाथ गौतम १४ वर्ष सपरिवार भारत निर्वासित हुँदा पुष्पा पनि संगै थिइन् ।
त्यस्तै, विद्या भट्टराई राजनीतिमा विद्यार्थी आन्दोलनबाट सक्रिय हुँदै आएकी नेतृ हुन् । उनी एमाले नेता राजन भट्टराईका बहिनी हुन् । अखिल नेपाल राष्ट्रिय स्वतन्त्र विद्यार्थी युनियनसँग नजिक भएर काम गरेको उनको भनाई छ । विद्याले पद्मकन्या क्याम्पसमा अध्ययन गर्दा विद्यार्थी आन्दोलनमा होमिएकी थिइन् । अनेमा संघ जिल्ला समिति काठमाडौंको कोषाध्यक्ष समेत भएर काम गरिन् ।
२०५० सालमा अनेरास्ववियु महिला विभाग प्रमुख भएर काम गरिन् । ०५५ मा अनेरास्ववियुको केन्द्रीय सचिवको जिम्मेदवारी लिएर काम गरिन् । त्यसबेला रवीन्द्र अधिकारी अनेरास्ववियुको महासचिव थिए । ०५६ मा अखिल नेपाल महिला संघ केन्द्रीय सदस्य र कार्यालय सचिव, बुद्धिजीवी परिषद सदस्य हुँदै विद्या प्राध्यापक क्षेत्रमा प्रवेश गरिन् ।
उनले ०६२÷०६३ को जनआन्दोलनपछि नेकपा एमालेको संघीय मामला विभागको सदस्य भएर काम छन् । उच्च शिक्षा पाठयक्रम निर्माण समितिको सदस्य भएर काम गरेको उनको अनुभव छ । त्रिभुवन विश्वविद्यालयमाको खुल्ला सेवा आयोग परीक्षा पास गरी ०७२ सालदेखि रत्नराज्य क्याम्पसमा स्थायीरुपमा उपप्राध्यापकको जागिर सुरु गरेकी उनी रवीन्द्र अधिकारीको निधनपछि तत्कालीन नेकपाको निर्णय मानेर कास्की–२ बाट प्रतिनिधि सभा सदस्यको उम्मेदवार भइन र जितेकी थिइन् । सांसद भएर आएपछि उनले जनजीविकाका सवालहरुमा आवाज उठाउँदै आएकी छन् । महँगी, भ्रष्टाचार, अनियमितता र न्यायका विषयमा सरकार र सरोकारवालाहरुलाई प्रश्न गर्दै आएकी छन् ।
