आषाढ ३१, २०८३ / 2026-07-15
काठमाडौं- फ्रान्सका कप्तान किलियन एम्बाप्पेले फिफा विश्वकपको सेमिफाइनलमा स्पेनसँग पराजित भएर बाहिरिएपछि प्रशिक्षक डीडियर डेसच्याम्प्सको रणनीतिप्रति सार्वजनिक रूपमा असन्तुष्टि जनाएका छन्।
स्पेनसँग मंगलबार राति २–० ले पराजित भएपछि एमबाप्पेले फ्रान्सको खेललाई ‘अव्यवस्थित’ र ‘फितलो’ भएको टिप्पणी गर्दै टोलीको रणनीतिमा गम्भीर कमजोरी रहेको बताए।
स्पेनले मध्यपङ्क्तिमा संख्यात्मक दबाब सिर्जना गर्दा फ्रान्स त्यसको सामना गर्न असफल भएको उनले बताए। उनले विपक्षीविरुद्ध ‘म्यान-टु-म्यान प्रेसिङ’ रणनीति अपनाएको भए खेलको नतिजा फरक हुन सक्ने धारणा राखेका छन् ।
एमबाप्पेले खेलका क्रममा खेलाडीबीच पर्याप्त समन्वय र सञ्चारको अभाव रहेको पनि औंल्याएका छन्। कप्तानका रूपमा हारको जिम्मेवारी आफूले पनि लिने उनले बताए । तर पनि टोलीको रणनीतिक तयारी प्रभावकारी नभएको भन्दै उनले प्रशिक्षकमाथि रिस पोखे ।
फ्रान्स विश्वकपबाट बाहिरिएसँगै १४ वर्षदेखि राष्ट्रिय टोली सम्हाल्दै आएका डिडिएर डेसच्याम्प्सको कार्यकाल पनि अन्त्य हुने भएको छ।
विभिन्न अन्तर्राष्ट्रिय सञ्चारमाध्यमका अनुसार फ्रान्सका पूर्वमहान खेलाडी तथा पूर्व जिनेदिन जिदान नयाँ प्रशिक्षक बन्ने भएका छन्। अब जिदान फ्रान्सेली राष्ट्रिय टोलीको नयाँ प्रशिक्षक बन्ने करिब निश्चित भएको छ।
डेली मेलका अनुसार एमबाप्पे पनि जिदानलाई फ्रान्सको नयाँ प्रशिक्षक नियुक्त गरिनुपर्ने पक्षमा देखिएका छन्। यद्यपि फ्रान्स फुटबल महासंघले यसबारे औपचारिक घोषणा गरिसकेको छैन।
