भाद्र ५, २०८३ / 2026-08-21
काठमाडौँ ।रास्वपाले संसदीय दलको नेता छनोट र अन्य विषयमा छलफल गर्न केन्द्रीय समिति बैठक बोलायो।
सहमति अनुसार बालेनलाई भावी प्रधानमन्त्री बनाउने र संसदीय दलको नेता बनाउने तयारी छ।
पार्टी विधानमा जेसुकै भए पनि सहमतिमै दलको नेता छान्न कुनै बाधा नपर्ने बताइएको छ।
राष्ट्रिय स्वतन्त्र पार्टी (रास्वपा)को केन्द्रीय समिति बैठक लगत्तै संसदीय दलको बैठक बस्ने भएको छ । रास्वपाले संसदीय दलको नेता छनोट र विविध एजेण्डबारे छलफल गर्नका लागि बिहीबार दिउँसो ४ बजे केन्द्रीय कार्यालय वनस्थलीमा केन्द्रीय समिति बैठक बोलाएको छ ।
पुस १३ गते काठमाडौँ महानगरपालिकाका पूर्वप्रमुख बालेन्द्र शाहसँग भएको ७ बुँदे सहमति भएको थियो । सहमतिको बुँदा नं. ४ मा रवि लामिछाने पार्टी सभापति र बालेनलाई भावी प्रधानमन्त्रीको उम्मेदवार बनाउने सहमति भएको थियो । तर रास्वपाको विधान अनुसार बालेनलाई संसदीय दलको नेता बनाउन नमिल्ने चर्चा चलेको छ । यद्यपि रास्वपाका नेताहरूले वरिष्ठ नेता बालेनलाई संसदीय दलको नेता बनाउन कुनै समस्या नभएको बताएका छन् ।
सचिवालय सदस्य गणेश पराजुलीले विगतमा भएको ७ बुँदे सहमति केन्द्रीय समितिबाट पहिल्यै अनुमोदन भइसकेकाले फेरि अनुमोदन गर्नुपर्ने आवश्यक नभएको बताए । संविधान र दल सम्बन्धी कानुनमा भएको व्यवस्था बमोजिम भोलि बस्ने संसदीय दलको बैठकले बालेनलाई दलको नेता छान्ने उनले जानकारी दिए ।
‘बालेनलाई भावी प्रधानमन्त्री बनाउने गरी भएको ७ बुँदे सहमति पहिल्यै नै पार्टीको सचिवालय र केन्द्रीय समिति बैठकबाट अनुमोदन भइसकेको छ । उहाँलाई संसदीय दलको नेता बनाउनका लागि फेरि केन्द्रीय समिति बैठकले निर्णय गर्नुपर्दैन’, रातोपाटीसँग उनले भने, ‘सर्वसम्मत रूपमा दलको नेता बनाउने भनिसकेपछि विधान संशोधन गर्न आवश्यक छैन । संविधान र दल सम्बन्धी कानुनमा निर्वाचित सांसदहरूले दलको नेता छान्ने भनेकाले त्यसलाई अनुमोदन गर्न भोलि दिउँसो ५ बजे संसदीय दलको बैठक बोलाएका छौँ ।’
सहमहामन्त्री विपिन कुमार आचार्यले पनि बालेनलाई संसदीय दलको नेता बनाउनका लागि केन्द्रीय समिति बैठक लगत्तै संसदीय दलको बैठक बस्ने जानकारी दिए । उनले पार्टी विधानमा जेसुकै व्यवस्था भएपनि सहमतिमै दलको नेता छान्नका लागि कुनै बाधा नपर्ने जिकिर गरे ।
‘हाम्रो पार्टीको विधानमा निर्वाचन अगावै पार्टी सदस्यहरूबाट संसदीय दलको नेता छनोट गर्ने भनिएको छ । तर, संविधानमा निर्वाचित सांसदहरू मध्येबाट दलको नेता छान्ने भनिएको छ । बालेनजीलाई भावी प्रधानमन्त्रीको उम्मेदवार बनाउने सहमति भइसकेकाले उहाँलाई दलको नेता बनाउन विधान संशोधन गरिराख्नु पर्दैन’, उनले भने ।
नवनिर्वाचित सांसदहरूले बिहीबार संसद भवन सिंहदरबारमा पद तथा गोपनीयताको शपथग्रहण गर्ने कार्यक्रम छ । शुक्रबार बालेनले प्रधानमन्त्रीको पद तथा गोपनीयताको शपथ लिने तयारी गरिएकाले त्यसअगावै पार्टीले उनलाई संसदीय दलको नेता चयन गरिएको जानकारी राष्ट्रपति कार्यालयलाई दिनेछ ।
फागुन २१ सम्पन्न प्रतिनिधिसभा सदस्य निर्वाचनमा रास्वपाले स्पष्ट बहुमत ल्याएकाले संविधानको धारा ७६(१) बमोजिम बालेनलाई राष्ट्रपतिले प्रधानमन्त्रीमा नियुक्त गर्नेछन् ।
