भाद्र ११, २०८३ / 2026-08-27
काठमाडौं– औषधि व्यवस्था विभागले बजारमा बिक्री भइरहेको ‘एनक्लेभ ओडी नामक एन्टिबायोटिक औषधि न्यून गुणस्तरको भेटिएपछि तत्काल बजारबाट फिर्ता (रिकल) गर्न निर्देशन दिएको छ ।
स्वास्थ्य तथा जनसंख्या मन्त्रालय अन्तर्गतको विभागले बजार अनुगमनका क्रममा संकलन गरिएको नमुना राष्ट्रिय औषधि प्रयोगशालामा परीक्षण गर्दा उक्त औषधि निर्धारित मापदण्डअनुसार नभएको जनाएको हो ।
विभागका अनुसार कोरेक्श फर्माट्युकल्स प्राइभेट लिमिटेडद्वारा उत्पादित ‘एनक्लेभ ओडी एमोक्सिसिलिन र क्लाभ्युलेनेट पोटासियम ट्याब्लेट आईपी को ब्याच नम्बर टिइओडी- ०२६ मा गुणस्तरसम्बन्धी समस्या भेटिएको छ ।
परीक्षणका क्रममा उक्त औषधि ‘प्रेस्क्राइब्ड आईपी २०२२’ को मापदण्डअनुसार अमोक्सिसिलिन र क्लाभुलानिक एसिडको मात्रा तथा डिसोलुसन परीक्षणमा असफल भएको विभागले जनाएको छ ।
उक्त औषधिको उत्पादन मिति डिसेम्बर २०२४ र म्याद सकिने मिति मे २०२६ रहेको छ । विभागले औषधि ऐन, २०३५ अनुसार उक्त ब्याचका सबै औषधि तुरुन्त बिक्री–वितरण रोक्न, बजारबाट फिर्ता गर्न तथा त्यसको विवरण विभागमा पेश गर्न सम्बन्धित उद्योग तथा वितरकलाई निर्देशन दिएको छ ।
साथै, विभागले उक्त ब्याचका औषधि सिफारिस, बिक्री, वितरण तथा प्रयोग नगर्न स्वास्थ्यकर्मी, औषधि व्यवसायी तथा सर्वसाधारणलाई समेत अनुरोध गरेको छ । विभागले नियमित बजार अनुगमनलाई तीव्रता दिँदै गुणस्तरहीन औषधि नियन्त्रणमा कडाइ गर्ने जनाएको छ ।
