भाद्र ६, २०८३ / 2026-08-22
रुपन्देही – भैरहवामा सञ्चालनमा रहेका क्यासिनोमा नेपाली नागरिकलाई प्रवेश गराइरहेको र प्रहरी संरक्षणको नाममा मासिक रकम तिरेको तथ्य सार्वजनिक भएको छ।क्यासिनो सञ्चालन सम्बन्धी कानुन अनुसार नेपालमा नेपाली नागरिकले क्यासिनोमा प्रवेश गर्न पाउँदैनन्, तर प्रत्यक्ष स्रोत र स्थानीय जानकारी अनुसार क्यासिनोले नेपालीहरूलाई सहज प्रवेश गराउने र प्रहरीलाई मासिक रकम उपलब्ध गराउने गरेको दाबी उठेको छ।
सूचना अनुसार प्रत्येक क्यासिनोले जिल्ला प्रहरी कार्यालय रूपन्देहीलाई मासिक २ लाख र लुम्बिनी प्रदेश प्रहरी कार्यालयलाई मासिक १ लाख रुपैयाँ पठाउने गरेको छ। भैरहवामा संचालित क्यासिनोले प्रहरीलाई मासिक ३ लाख रुपैयाँ बुझाउने प्रचलित अभ्यासमा रहेको तथ्य सार्वजनिक भएको छ। स्रोतका अनुसार, प्रत्येक क्यासिनोले प्रहरी संरक्षण सुनिश्चित गर्न र अनुगमनको दबाब कम गर्न मासिक रूपले रकम बुझाउने गरेको बताइएको छ। यस प्रथाले नेपाली नागरिकलाई क्यासिनो प्रवेश र खेलमा सहज पहुँच दिलाएको भए पनि कानुन र नियमको स्पष्ट उल्लंघन भएको छ।
यसले नेपाली नागरिकले क्यासिनोमा प्रवेश गर्दा प्रहरीको छापा नलाग्ने वातावरण सुनिश्चित गरेको बताइएको छ।कानुनले नेपाली नागरिकको प्रवेश निषेध गरे तापनि व्यवहारमा सरल पहुँच मिलेको, र प्रहरी अनुगमनको कमीले नियमको प्रभावकारिता कम भएको देखिएको छ।
यो प्रकरणले क्यासिनो उद्योगको आर्थिक पक्ष र सामाजिक नियमबीचको द्विविधा उजागर गरेको छ। उद्योगले विदेशी मुद्रा र पर्यटनका लागि अवसर दिने भए पनि स्थानीय नागरिकको सहभागीता, सुरक्षा व्यवस्थापन र प्रशासनिक जिम्मेवारीबारे प्रश्न उठाएको छ।पछिल्लो समय रुपन्देहीमा संचालित मिनी क्यासिनोहरु विवादमा पर्न थालेका छन्। क्यासिनो नियमावली २०८२ पालना नगरी मनपरी क्यासिनो संचालन भइरहेको भन्दै नियमनको आवाज उठ्न थालेको छ।
प्रशासनले मिनी क्यासिनोलाई सुरक्षा जाँच कडा गर्ने, नेपाली नागरिकको प्रवेश रोक्ने र क्यासिनो नियमावलीका शर्त तथा मापदण्ड पालना गर्ने निर्देशन दिएको छ। विशेषत, केही क्यासिनोमा नेपाली नागरिकले भारतीय आधारकार्डको झुटो प्रमाणपत्र देखाएर प्रवेश गर्ने गरेको पाइएको थियो।रुपन्देहीका प्रमुख जिल्ला अधिकारी माधवप्रसाद पोखरेलले क्यासिनो संचालकलाई क्यासिनो नियमावलीको नीति, मापदण्ड र शर्त पालना गर्न कडाइका साथ निर्देशन दिएका छन्। उनले भनेका छन् कि, “क्यासिनो सञ्चालन गर्दा कानूनको पूर्ण पालना हुनुपर्छ र सुरक्षा मापदण्ड र प्रवेश नियमको उल्लङ्घन हुन नदिनुपर्छ। उल्लङ्घन भएमा प्रशासन कानुनी कारबाही गर्न पछि हट्ने छैन।”यसअघि पनि स्थानीय प्रशासनले क्यासिनो अनुगमन बढाउने र नियम उल्लङ्घन भए कारबाही गर्ने योजना सार्वजनिक गरेको थियो। नियमको पालना नगर्ने वा नेपाली नागरिकलाई अवैध प्रवेश दिनेलाई कडाइका साथ दण्डित गरिने भएकोले, क्यासिनो संचालकहरूले अब सुरक्षा मापदण्ड, ग्राहक परिचय प्रमाण र अन्य नियमावली पालनामा विशेष ध्यान दिनुपर्ने स्थिति आएको छ।
भैरहवामा संचालित क्यासिनोमा नेपाली नागरिकलाई प्रवेश गराउने र खेल्न जाने व्यक्तिहरूको विवरण इन्ट्री नगर्ने गतिविधि भइरहेको पाइएको छ।क्यासिनो नियमावली अनुसार, ग्राहक प्रवेश गर्दा गेटमा डिटेक्टर मेसिनले सुरक्षा जाँच गर्नुपर्ने प्रावधान छ। तथापि, सर्वेक्षण र अनुगमनका क्रममा पाइएको छ कि केवल एक–दुई क्यासिनोले यो सुरक्षा मापदण्ड पालना गरेका छन्, बाँकी अधिकांश क्यासिनोले यो सुरक्षा मापदण्ड पालना गरेका छैनन्।
यसैबीच कार्यालयले क्यासिनोले प्राप्त गरेको इजाजतपत्र, संचालन भइरहेको खेल र सेवाहरू, नगद तथा वित्तीय कारोबार, आकस्मिक लाभकर दाखिला, आधार कार्ड प्रयोग गरी प्रवेश गर्ने नेपाली नागरिकको विवरण, प्रतिबन्धित भारतीय नोटको कारोबार, सीसीटीभी अभिलेख र करचुक्ता तथा इजाजतपत्र नविकरणसम्बन्धी जानकारी मागेको छ।राजश्व अनुसन्धानका अधिकारीहरूले भने, “क्यासिनोमा वित्तीय कारोबार पारदर्शी हुनुपर्छ। आवश्यक विवरण उपलब्ध भएपछि मात्र नियमअनुसार निगरानी सम्भव हुनेछ।” मिनी क्यासिनोको अवैध सञ्चालनले स्थानिय समाजमा कानुनी नियम र सामाजिक नैतिकता बीच द्वन्द्व सिर्जना गर्न सक्ने भएकाले प्रशासनले निगरानी थप कडा गर्नु आवश्यक छ।
