भाद्र १०, २०८३ / 2026-08-26
काठमाडौँ । मधेस प्रदेशका मुख्यमन्त्री जितेन्द्र सोनललाई माओवादीका प्रदेश प्रदेश सभाका दुई सांसदले विश्वासको मत नदिने घोषणा गरेका छन् ।
प्रदेश सभाको शनिबारको बैठकमा प्रदेश सांसद रहबर अन्सारी र माला कर्णले मुख्यमन्त्री सोनलको सरकारलाई विश्वासको मत नदिने घोषणा गरेका हुन् ।
सदनमा बोल्दै आफ्नो अनुहारमा कालो मसो लगाउँदै प्रदेश सांसद अन्सारी र कर्णले मुख्यमन्त्री सोनललाई विश्वासको मत नदिने बताए ।
पार्टी निर्णयबेगर विश्वासतको मत नदिए पनि उनीहरूले पार्टीले कारबाही गरे भोग्न तयार रहेको पनि बताए ।
‘अहिलेको सरकारलाई विश्वासको मत दिँदैनौँ, पार्टीले हामीलाई सजाय दिए पनि हामी भोग्न तयार छौँ,’ बैठकमा उनीहरूले भने । त्यसपछि माओवादी संसदीय दलका नेता भरत साहले उनीहरूलाई बाहिर लगेर सम्झाएका थिए ।
साथै बोलिरहेका बेला सभामुख रामचन्द्र मण्डलले माइक काट्नुअघि अन्सारीले विरोध जनाउँदै एक्कासि आफैँलाई मोसो दले । सांसद अन्सारीले सदनभित्रै मोसो दलेपछि बैठकमा हंगामा भएको थियो ।
