लक्ष्मी पूजाको दिन आज एक/दुई ठाउँमा छिटपुट वर्षाको सम्भावना

काठमाण्डौ – लक्ष्मी पूजाको दिन आज देशका एक/दुई ठाउँमा छिटपुट वर्षाको सम्भावना छ । आज देशका धेरै ठाउँमा मौसम सफा नै छ । तर कोशी, बागमती, गण्डकी र कर्णाली प्रदेशका पहाडी क्षेत्रमा भने आंशिक बदलीको अवस्था छ । साथै यी क्षेत्रको एक/दुई ठाउँमा फाटफुट वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।

तिहारको अवधिमा ठूलो पानी पर्ने सम्भावना छैन । भोलि पनि देशका पहाडी क्षेत्रमा आंशिक बदली र अन्य ठाउँको मौसम सफा रहने अनुमान छ । त्यस्तै पर्सि बुधवार पनि देशका पहाडी क्षेत्रमा आंशिकदेखि साधारणतया बदली रहने र कोशी तथा कर्णाली प्रदेशका उच्च पहाडी तथा हिमाली क्षेत्रमा हल्का वर्षा वा हिमपातको सम्भावना रहेको महाशाखाले जनाएको छ ।

भाइटीकाको दिन बिहीवार पनि सबैजसो ठाउँमा मौसम सामान्यतया सफा रहने अनुमान छ । बिहीवार कोशी, मधेश र अन्य पहाडी क्षेत्रमा आंशिकदेखि साधारणतया बदली रहने अनुमान छ । साथै, उच्च पहाडी तथा हिमाली क्षेत्रमा हल्का वर्षा वा हिमपात हुन सक्ने महाशाखाले जनाएको छ ।