भाद्र ११, २०८३ / 2026-08-27
काठमाडौं । नेपाली कांग्रेसको १४ औं महाधिवेशन अन्तर्गत काठमाडौं जिल्लाको पालिका तह अधिवेशन आज हुँदैछ । १ महानगरपालिकासहित ११ स्थानीय तह रहेको संघीय राजधानी काठमाडौंमा १० पालिकाको मात्र आज अधिवेशन हुन लागेको हो ।
काठमाडों महानगरको भने ९ बजे नेता प्रकाशमान सिंहले अधिवेशनको उद्घाटन गर्नेछन् ।
जिल्ला निर्वाचन अधिकृत नरहरि आचार्यका अनुसार दक्षिणकाली नगरपालिकाको भने अधिवेशन रोकिएको छ । वडा नम्बर २ को वडा अधिवेशन हुन नसक्दा अधिवेशन रोकिएको आचार्यले जानकारी दिए । “वडाको पटकपटक अधिवेशन गर्न खोज्दा सकिएन त्यसैले अधिवेशन रोक्नु पर्यो, केही दिनभित्र हामी अधिवेशन गर्छौंं,” उनले भने ।
आचार्यका अनुसार पालिकाहरुमा सहमतिमा नेतृत्व चयनको प्रयास भइरहेको छ । सबैभन्दा ठूलो काठमाडौंं महानगरमा भने निर्वाचननै हुने भएको छ । निर्वाचन हुने पालिकाको हकमा समितिले भोलि साँझसम्म अन्तिम नतिजा दिने तयारी गरेको छ । “निर्वाचन भयो भने पनि भोलि साँझसम्म हामी नतिजा दिने तयारीमा छौं,” उनले भने, “अब कति पालिका तहमा निर्वाचन हुन्छ हेरौं, प्राविधिक समस्या भएन भने नतिजा प्रकाशनमा ढिलाई हुँदैन ।”
