भाद्र २, २०८३ / 2026-08-18
काठमाडौं- पूर्वराजा ज्ञानेन्द्र शाह मेडिकल व्यवसायी दुर्गा प्रसाईको कार्यक्रममा सहभागी नहुने भएका छन् । प्रसाईले कार्यक्रम गर्नुअघि नै पूर्वराजा ज्ञानेन्द्र शाह आइतबार चितवनतिर लागेका छन् ।
प्रसाईले काठमाडौंमा फागुन १ गते गर्ने विरोधसभामा पूर्वराजा ज्ञानेन्द्र शाहलाई प्रमुख अतिथिका रुपमा निम्तो दिएका थिए ।
प्रसाईले भनेका थिए, ‘राजाले टाउको हल्लाइबक्सेको छ, आउनुहुन्छ होला ।’
तर, पूर्वराजा शाह कार्यक्रमअघि नै चितवनतिर लागेकाले प्रसाईको कार्यक्रममा आउने सम्भावना नरहेको स्रोतको भनाइ छ ।
पूर्वराजाका सम्वाद सचिव फणिराज पाठकका अनुसार ज्ञानेन्द्र र कोमल दुबैजना जिल्ला भ्रमणको सिलसिलामा चितवन गएका हुन् ।
आइतबार भरतपुर विमानस्थलमा पुग्दा पूर्वराजा शाहलाई समर्थकहरुले स्वागत गरेका थिए ।
जिल्लाका विभिन्न स्थानको भ्रमण गर्ने योजनामा चितवन पुगेका पूर्वराजा पटिहानीस्थित होटल सोल्टीमा बसेका छन् । राप्रपाका स्थानीय नेताहरुका अनुसार शाह पारिवारिक भ्रमणमा चितवन झरेका हुन् ।
